រាជធានីភ្នំពេញ៖ នៅថ្ងៃសៅរ៍ ទី៣០ ខែមីនានេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានផ្ញើសារលិខិតអបអរសាទរ និងជូនពរចំពោះឯកឧត្តមកិត្តិសង្គហបណ្ឌិត ទេព ងន និងឯកឧត្តមកិត្តិនីតិកោសលបណ្ឌិត ស៊ឹម កា ដែលត្រូវបានព្រះមហាក្សត្រសព្វព្រះរាជហឬទ័យតែងតាំងជាឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា។

នៅក្នុងលិខិតចុះហត្ថលេខានៅថ្ងៃទី៣០ ខែមីនា ឆ្នាំ២០២៤ សម្តេចធិបតី ហ៊ុន ម៉ាណែត បានសម្តែងនូវការអបអរសាទរ និងការកោតសរសើរដោយសុទ្ធចិត្តជូនចំពោះឥស្សរជនទាំងពីររូបគឺឯកឧត្តមកិត្តិសង្គហបណ្ឌិត ទេព ងន និងឯកឧត្តមកិត្តិនីតិកោសលបណ្ឌិត ស៊ឹម កា ដែលតាំងពីអតីតកាលរហូតបច្ចុប្បន្ន តែងតែបូជាកម្លាំងកាយ កម្លាំងប្រាជ្ញាស្មារតី និងការធ្វើពលីកម្មសព្វបែបយ៉ាង ដើម្បីបន្តធានាការពារឯករាជ្យជាតិ អធិបតេយ្យជាតិ និងបូរណភាពទឹកដី ការពារដាច់ខាតនូវរាជបល្ល័ង្គ និងរបបរាជានិយមអាស្រ័យរដ្ឋធម្មនុញ្ញនៅកម្ពុជា ជាពិសេសការបម្រើឧត្តមប្រយោជន៍ជាតិ សាសនា ព្រះមហាក្សត្រ និងប្រជាជនជាទីស្នេហាបំផុតនៃយើង។

សូមបញ្ជាក់ថា នៅថ្ងៃទី២៩ ខែមីនា ឆ្នាំ២០២៤ ម្សិលមិញនេះ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានត្រាស់បង្គាប់តែងតាំងឯកឧត្តមកិត្តិសង្គហបណ្ឌិត ទេព ងន និងឯកឧត្តមកិត្តិនីតិកោសលបណ្ឌិត ស៊ឹម កា ជាឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា មានឋានៈស្មើឧបនាយករដ្ឋមន្រ្តី៕